Joey & Francis 1001

Welcome to Joey & Francis's 1001, the central where you can find everything about our wedding that will take place on Oct 1, 2012. We will keep on updating this website with more information such as our pre-wedding photos and details of our wedding day! We will also be posting blogs about our own thoughts and the bits and pieces of the preparation process of our big day. You can start by reading our blogs below or access the older entries from the right side of the page and please do not forget to sign our guestbook where we have a question for all of our new and old friends! See you around!
 

“Will you be my Bridesmaid/Bridesman/Maid of Honor?”

“Will you be our Wedding Church Ceremony Choir Singer?”

令已經好抵嘅婚紗更加抵!

今日有個令我非常、非常興奮嘅驚喜,令我超忙都要抽時間去紀錄一下!

 

之前有提過我婚禮當日條婚紗會喺 dressilyme.com 度訂。雖然佢地係內地嘅廠,但佢地專門接美國訂單,所以 PayPal 係一個唔少得嘅 payment option. 當然 PayPal 亦係喺呢個情況下我最 prefer 嘅付款方法。 至於我點解會 prefer 用 PayPal 就要由我個網上商店 chocolate-circle.com 開始講起。

 

我喺 2008 年 (即係同 Francis 開始拍拖嗰年)set up 我嘅網上商店。靈感係來自一次去喺學界好出名嘅深水埗文具精品批發街——福榮街——去幫學校買禮物俾小朋友。點知我望望吓,見到一啲好得意、雪糕形狀嘅原子筆,同埋一啲好似一排朱古力咁嘅記事簿。其實我除咗係一個好鍾意食嘢嘅人之外,我亦好鍾意一啲食物造型嘅 product. 而我記得以前玩 neopets 嘅時候,我留意到 neopets 個世界裡面有好多朱古力嘅 virtual items 好多人都會買嚟儲,令我估計其實有好多人都鍾意食物造型嘅嘢,特別係朱古力或者甜品造型嘅。我喺深水埗見到啲咁得意嘅 product, 自己又住過加拿大知道外國好少呢啲咁得意嘅嘢賣,就算有都好貴,所以我就試吓每樣買幾件試吓放上 ebay 賣。好彩我識得基本嘅寫網頁同影相嘅技巧,我嗰 晚返到屋企就花咗啲時間去參考咗一啲人地嘅ebay 舖,然後做咗一啲 graphics 同影咗啲相,將我買返嚟嘅 “雪糕” 同 “朱古力” 放上去賣喇。點知,我瞓醒一覺,放咗啲嘢上去唔夠12個鐘就已經賣出咗,我標嘅仲要係成本嘅 10 倍價錢!於是乎 Chocolate Circle 就由嗰日開始,到後來舖頭有自己嘅網址,我就定時喺我最喜愛嘅淘寶入貨,一直做到今日喇。而呢兩個 products 到今時今日都仲係係我舖頭嘅皇牌 products 嚟㗎!

 

 

亦因為我有喺 ebay 開嘅呢個網店,我一定要用 PayPal 收錢,我亦喺呢個情況發現到 PayPal 有幾衰。由啲 Customer Rep 淨係識一字不漏咁對住份 sales script 去答你嘅問題,任何嘢都唔會酌情處理同埋 check 少少嘢都要等超耐,到到個兌換率衰到無人性。喺任何正當銀行美金對港幣 7.8 係 standard, ung 衰都起碼有 7.7, 但係呢間不知所謂嘅 PayPal 竟然係兌 7.5 最多都偶然係 7.6! 所以我標價都要因住呢個兌換率去計算。

 

不過慶還慶,竟然俾我發現呢個情況都有好處。當我自己要買嘢嘅時候,我係可以用買家入落我 PayPal 裡面嘅 balance 去買嘢嘅。而因為到頭嚟我每一蚊美金只可以攞返 7.5 港紙,所以如果我用 PayPal 俾錢,一蚊嘅 product 對我嚟講只係 7.5 港紙,變相令到所有嘢都平晒!

 

就係因為呢個原因,我好開心知道 dressilyme 可以用 PayPal 俾錢,但係可惜我 PayPal 裡面一直唔夠錢去俾婚紗嘅錢。原因係首先之前已經用 PayPal 買咗一 round decoration 嘅嘢,另外因為我近幾個月都忙搞學校同 wedding 嘅嘢,放咗好少時間喺 Chocolate Circle 度,令到舖頭嘅營業達到歷年新低。加上每個月又有啲自動轉賬抽走我 PayPal 嘅錢,所以我等嚟等去 PayPal 裡面都係一直唔夠錢俾條婚紗。但係因為 dressilyme 25日就可以幫我做起條裙,所以我一直諗住慢慢等,等到儲夠 237.88 美金先俾錢。

 

但係,啱啱呢個週末有朋友同我講:「小姐你得返唔夠三個月,請問你條婚紗搞掂未?」我先知道原來時間無多,真係要快啲訂做條裙。但係我望一望,見 PayPal 裡面都仲係爭少少未夠錢,不過我亦唔可以再等,唔係可能等到結完婚都仲未夠。我唯有決定忍痛去用 credit card 俾錢。

 

點知我喺臨要俾錢咁關鍵性嘅一刻之前,突然收到 PayPal 個 email, 通知我我有一條 90 蚊美金嘅入賬交易!話說呢筆賬項係嚟自一位喺印度嘅商人,之前問就問咗好耐,諗住好似我偶然有啲嘅客人咁,同我批發入貨,但就想先入啲辦睇睇。之前開咗張 90蚊美金嘅單俾佢但一直無俾又無晒聲氣,諗住都係無咪粥多。但係點知佢就喺最 critical 嘅一刻俾咗錢,令我 PayPal 裡面突然有足夠嘅錢、可以享受最抵嘅兌換率去買我呢條婚紗!

 

本來如果用 credit card 俾 237.88 美金連埋 0.5% 信用卡嘅海外交易手續費加埋用 7.75 個兌換率即係要俾港紙 $1948;宜家用 PayPal 只係需要俾 $1807 港紙去定做條婚紗,將本來已經超平嘅婚紗搞到更加平!呢個臨尾突然嚟嘅驚喜,真係令我實在太過、太過興奮,同需要好好咁感恩一下!:D

 

DIY in progress

 

image

 

Our DIY team work in progress.

 

全球最懶準新娘

 

我相信我有機會可以藉著今次籌備婚禮,打破一個世界紀錄,就係全球籌備婚禮最懶嘅準新娘。

 

識我嘅人都知,我無可能會求祈搞一個 party 或者 event, 所以的確我唔係無做嘢㗎。只不過係,我竟然係足不出戶咁搞,全部嘢都喺電腦都設計同 plan, 喺網上做 research, 同大部分嘢都係上網買!暫時我喺淘寶買咗兩大 lot 嘢要利發幫我發嚟香港。當中好多係結婚嗰日某部份嘅 decoration. 而我之前四月頭影 prewedding 啲衫,都係上淘寶買,懶到咁!

 

其實我都有出吓去買嘢嘅。譬如上次去金都買 girdle 同啲鞋,同埋臨飛前啲 last minute shopping, 但基本上好多香港新娘必到嘅結婚展、金巴利道、影結婚相公司、production/decoration 公司莫講話 wedding planner 公司等等,都完全無我嘅影!

 

我聽到有人細細聲話我懶特別喎!平時係,不過今次真係唔係。事實上,唔去周圍試婚紗其中一個原因係自從肥咗之後,真係唔鍾意去試衫除衫試衫除衫試衫除衫,因為個人好易攰,同埋行得多腳會痛。我亦知我係一個好煩同好敏感嘅客人,呢幾年習慣咗上網隔住個電腦同個 seller 或者 service provider 慢慢溝通,大家都無咁大壓力。

 

我自己宜家更加期待到嗰日,睇吓呢個嚟自 virtual wedding preparation 出道嚟個效果係點!希望唔好太失禮啦!

 

買裙買到有錢賺

 

終於講到我今次買影相嘅衫嘅高潮位喇!

 

淘寶買裙

 

話說我今次影相同我個 image stylist 一致決定咗會有七個造型,兩個人總共加埋十四套衫仲未計首飾同鞋。所以為咗荷包著想,唔少嘅 wardrobe 會喺淘寶搞掂,其中就有我嗰幾條裙喇。

 

我用咗幾晚喺淘寶揾好晒我鍾意嘅裙,就 send 晒俾 Jammie 篩選。最後決定要訂做兩條旗袍、一條婚紗、一條晚裝同買一條現成嘅 casual wear 。 當時候係三月頭,我仲有一個月先要去影相。時間話多唔多、話少唔少,所以我都同每個賣家講清楚我要三月第三個禮拜就收到貨。到時後利發嗰邊用兩、三日時間發落嚟香港俾我,我喺香港仲有時間改。一路等呀等,終於等到三月第三個禮拜。根據運單編號所顯示,所有賣家嘅衫都到晒利發嗰邊,除咗條晚裝裙。

 

心愛的蝦肉雅典娜

 

其實我揀到嗰條晚裝裙都幾唔簡單。好多人好有心機出去試衫,譬如我今晚同個朋友食飯,佢同我講總共試過嘅婚紗有五十幾、六十幾條!而我都唔輸蝕,分別在於我足不出戶,但喺淘寶睇咗成千條裙都有。而呢千條裙裡面竟然只有一條我係非常之鍾意。當我知道呢條雅典娜風格嘅晚裝裙係可以訂做,我就根據佢地提供嘅相揀咗蝦肉色同俾埋晒我嘅尺碼俾佢地幫我做條裙。同其他賣家一樣,呢個賣家都話可以三個禮拜內可以起貨。

 

 

當我其他裙都一條一條咁到咗利發,唯獨是係晚裝裙連貨都未發,我當然即刻問個賣家。佢都唔算覆得慢,但係佢就話裙已經寄出咗,不過運單號碼唔喺手,要轉頭先可以俾我。如是者佢每一次都係咁講,我等吓等吓就過咗幾日。個賣家竟然突然同我講話原來佢個同事搞錯咗。佢話條裙其實做錯咗色,我將會收到嗰條嘅顏色同尺碼都係錯嘅,問我可唔可以要。如果唔可以就即刻做過條俾我,並可以第二日即刻發順丰俾我,而當我收到條裙嘅話就退返俾佢地咁話。問題係佢同我講發俾我條裙係我最驚嘅粉紅色,所以我同佢講我唔可以要。況且尺碼都唔啱。我計一計,時間都仲可以等,咁我就同佢講叫佢即刻開始做過條俾我,我等佢。

 

到第二晚,佢就同我話條裙已經做好咗,已經發咗貨,話會第二朝俾個運單號碼俾我。我聽到都放咗半個心。但因為我自己都好忙,有好多臨飛前嘅嘢要搞,所以最後無追佢攞單號,諗住今次應該無甩拖啦。又過咗幾日,我問過利發都係無嘢到,於是我突然心知不妙,即刻旺旺個賣家。回覆我個人話自己係小二唔知乜事,但係竟然立刻退款俾我。我初初收到個退款收得好爽,但係就醒起退咗款我就唔可以用俾差評嚟威脅佢,覺得蠢咗,於是乎我立刻打長途俾個賣家。

 

淘寶神經刀

 

就係呢個時候個賣家帶嚟一個比噩夢更恐怖嘅消息。佢話原來其實佢地一直都無做起過條裙,因為佢地買唔到我想要嗰隻蝦肉色布,仲一直喺度揾緊。唔係做衫嘅我都知,嗰種嘅紗係好普通嘅姊妹裙質地,週圍都揾得到。我真係唔知佢發緊乜嘢噏風!總之呢個消息嚟得太突然,同埋我已經時間無多,我當場控制唔到喺個電話度鬧到佢飛起。而最奇怪嘅事終就係喺呢一刻發生。當我喺度鬧爆佢時,話我無衫去影相(我之前有同佢講話件衫係影相用),佢話佢已經退返錢俾我啦!我話你退錢俾我有鬼用,我咁嘅尺寸突然間去邊度買現成衫??雖然我鬧到成個癲婆咁,但佢無收線不特止,仲答應話今次真係會即刻做起條裙俾我,然後立刻發俾我。但我當然無可能再信佢!佢竟然同我話佢會發啲錢過嚟俾我,如果我收唔到條裙就攞啲錢去買過條裙,仲問我要幾多錢!我大佢話要條裙一倍嘅價錢 600 蚊,並真心同意佢話如果我一收到條裙就會即刻退返錢俾佢。注意我係真心答應佢,因為嗰一刻 I really cared about getting the dress more than anything else。個賣家竟然真係立刻喺個電腦度過錢俾我,重要過完先收線。其實佢真係可以一早收我線,因為我都已經唔可以俾差評佢,佢亦知我喺香港,做唔到啲乜。我真係用盡我不俗嘅偵探頭腦都諗唔明呢位神經刀諗緊乜!

 

最後當然條裙係無嚟到。我喺淘寶買嘢都算係老手,接觸無一千都有幾百個賣家,卻從來未遇過一個咁厚顏無恥地吹水同老作嘅賣家。雖然佢最後係賠錢俾我,我亦好開心,但不得不承認呢個實在係一個非常莫名其妙嘅賣家,零願賠 600 蚊人民幣俾我都唔肯趕少少做起條裙俾我。咁我亦唯有收下佢嘅「好意」。咁到底最後我搞唔搞得掂我條晚裝裙呢?

 

破釜沈舟之百利一戰

 

我同個賣家開拖嗰日已經係禮拜一,而我係禮拜三飛。時間無多,我唯有週圍問人邊度有多啲款、多啲尺碼嘅裙俾我揀。最後我決定咗去百利。其實我已經無諗住喺香港咁少時間可以 600 幾蚊搞掂到一條晚裝裙,揾到已經偷笑,重邊有資格睇價錢?我去到百利,一層一層咁行,有啲款同尺碼好似可以,但係一試上身都係唔得。最後行晒三層,乜嘢都買唔到,嗰一刻任何危機都唔怕嘅我覺得前所未有嘅徬徨。陪住我嘅老番,唯有陪我從三樓開始掉轉頭再行一次。

 

其實行多一次啲裙同舖頭都唔會唔同晒,所以好多基本入都唔駛再入去睇。不過當我行落到一樓,我入返去一間之前有入過去睇嘅舖頭。其實佢唔係啲衫唔得,而係我第一次入去嘅時候都無點睇,個老闆娘答乜都寸寸貢,我都無意思繼續睇落去。今次行返轉頭,因為真係行完成個場都無收穫,唯有死死地氣入去睇多次。當我喺度撥開喺個架啲密質質嘅裙逐條睇嘅時候,我霎眼望到啲裙下面打橫放嘅兩張長櫈仔。我突然醒起一個畫面,然後我問個老闆娘:「呢度係咪 Yvonne 嘅舖頭呀?」而個老闆娘就話「我咪 Yvonne 攞!你係邊個呀?」

 

再見舊友感觸萬千

 

之後接住嘅就係一番好感觸同興奮嘅相認。故事係咁嘅,話說我中學時期有一位同學喺百利度揾咗一份暑期工,就係 exactly 呢一間舖頭做 sales 喇。而我地幾個同學會成日落去陪吓佢坐、陪吓佢傾計咁,而我地就正正係成日坐喺呢兩張長櫈度。隔咗咁多年,我地一個二個都大晒,亦好耐無落百利。但係估唔到 Yvonne 一直仲搞緊間舖,繼續幫人做裙,而兩張長櫈亦一直源用至今!

 

相認過後 Yvonne 亦抹走咗之前怕我係混吉人嘅防衛心,好俾心機好專業咁幫我。我同佢娓娓道來我單淘寶奇聞,佢亦同我講只要我係揀佢地手頭上嘅款,佢就可以 24 小時起到條裙俾我,仲係只需要 500 蚊!但係因為我之前心裡面一直都諗住條蝦肉色裙係一定得,所以都無諗過我仲可以著咩款,所以呢一刻佢問我想要咩款我都唔識答佢。最後都係由 Yvonne 幫我揀款同顏色。佢建議咗一條會著得我瘦同埋影相會靚嘅珊瑚紅色俾我。同埋佢為咗等條裙顯得高貴啲,仲免費送條閃石俾我釘喺上面用。決定好晒啲嘢之後 Yvonne 答應我 24 小時內一定可以做起,叫我第日五點上去攞!竟然喺 last minute 彈出一個 reconnect 同一個咁好嘅解決辦法,令我舒一口氣放心晒之餘,亦不得不承認實在太戲劇性!

 

危機修復

 

再重申一次,嗰日係禮拜一,我地禮拜三一早就要飛。之前就係為咗等條蝦肉色晚裝搞到其他所有衫禮拜一先到香港,mun 到呢……! 本來禮拜一係應該要攞兩條太窄嘅旗袍出去放,但係實在係補買條晚裝裙緊要啲,所以我亦無時間理啲旗袍住。喺禮拜二嗰朝我問到有朋友話百利有間改衫好出名嘅,於是禮拜二我地帶埋啲旗袍去百利,一次過改埋同 pick up Yvonne 條裙。條裙試上身,覺得 Yvonne 講得無錯,呢個款同呢隻色真係好顯瘦哦!!!我同老番都好鍾意、好滿意!:D Yvonne 真係實實在在咁救咗我地一命!

 

 

改衫方面,因為個裁縫得一對手,淨係可以幫我改一件旗袍。咁我情急底下,諗到個方法,就係揾佢隔離嗰間幫我改另外嗰條。當我等緊啲旗袍嘅時候就上返一樓上去做一樣我一路要做但係都無時間做嘅嘢--就係修甲。最後啲衫改好晒,fit 晒,我啲手甲都靚晒!我地就一抽二袋咁去同 wholala 家人食晚飯。雖然遲咗成個鐘,但係佢地都知道我地第二日要飛,好多手尾要搞,所以都好體諒我地!

 

The happiest ending…and beginning

 

最完美嘅係,本來約唔到俾 Jammie 睇嘅 final fitting 都喺嗰晚搞掂埋。食完飯佢上我地屋企幫我地 confirm 晒所有配搭,即係呢件西裝襯我呢條裙,同埋配呢對鞋同呢啲首飾。其實佢第二朝一早都要上機去台北,但係佢冒死都嚟幫我地 check 埋啲嘢。全靠佢嘅犧牲,令我地可以好有信心、好安心咁對住啲鏡頭,啲相效果出到嚟好好佢絕對應記一功! 真係要同 Jammie 講多幾百次多謝都唔夠!

 

喺最後一日我地竟然可以一樣不漏咁搞掂晒所有嘢,個賣家肯退返條裙嘅錢俾我不特止,仲肯倒賠 600蚊人民幣俾我。而我只係 500 蚊港紙就可以買返一條好鍾意嘅裙!真係要恕我有以下嘅結論--幫 wedding 買衫買到有錢賺,邊個夠我嚟??

 

曼谷結婚相夢幻團隊

 

籌備經月嘅呢個曼谷結婚相之旅終於完成,我地終於搞掂晒所有嘢返咗嚟。如果要 share 所有喺嗰邊發生嘅嘢,真係寫到十月一號,仲要日日寫,都寫唔完!

 

雖則係咁,但係今次經歷實在好難忘,我地都覺得好有需要紀錄底起啲細節,希望第時都可以睇返、重溫返、回味返。

 

總括嚟講成個旅程我地係極之感恩。我地知道搞一個婚禮可以有萬般阻濟同 frustration,當然我地去到嗰邊都係有遇到小小困難,但係整體嚟講絕對係好開心、好順利!以下就係每一個範疇一啲好想同大家分享嘅重點。

 

通訊篇

 

首先我地今次好順利喺機場買到連 data plan 嘅 sim card, 個 plan 繼續係 offer 緊同之前一樣,即係 airtime 1.25 baht 1 分鐘加每日 49 baht 任上網,打長途電話都只係 3 baht 一分鐘。 我地亦買咗張唔駛上網嘅卡俾 Catherine 等我地如果分開車或者分開活動都可以保持聯繫。有咗一個咁全面咁抵嘅通訊系統, 我地成個 trip 確係少好多麻煩同壓力。

 

*註:一蚊港紙大約等於四蚊泰銖

 

交通篇

 

今次因為時間緊逼嘅關係,我地嘅小狼隊隊長老番一早喺香港已經喺部 iPad 嘅 Map 裡面 mark 好晒所有我地要去嘅地方。然後每次上的士前就 set 好個 waypoint. 加上我一口流利嘅四句泰文--「轉左」、「轉右」、「慢啲」同「停」,我地幾乎係通行無阻。唯獨是有一次好夜,我地影完相 drop Angus 返 hostel,我懶叻咁點咗個司機入咗去條細得濟嘅窄巷度去送 Angus 到間 hostel 個門口。最後搞咗差唔多 20 分鐘先掉到頭出嚟。駕車仲 high 花咗啲,真係好對個司機哥哥唔住!

 

住宿篇

 

今次我地 6 日 5 夜,頭三日住一間,之後 2 日住另 1 間。呢兩間 B&B 我地之前都無住過,因為唔平嘅。但係今次因為買到咁平嘅 Air Asia 機票所以有多餘錢住貴啲,就揀咗呢兩間我想住咗好耐,同埋影相會好靚嘅 B&B. 雖然第一間 Baan Pra Nond 對於我地喺佢地 property 影相有啲問題,但係我地最後都影晒我地要影嘅嘢,而第二間 Phranakorn Nornlen 更無問題不特止,仲要全程配合到不得了。佢地絕對對的住 The Land of Smiles 呢個美譽嘅嗰份熱情令我地非常感動!

 

飲食篇

 

我地今次好多相係揀咗喺餐廳影,同埋好彩有咁多人一齊,於是我終於可以喺泰國叫好多嘢食!!相比起以前成日淨係得我地兩個口子都叫唔到啲乜(雖然我嘅「叫唔到啲乜」已經係正常人嘅 3 倍)。最開心嘅係,對食嘢有要求嘅 Catherine 同 Bobby 都覺得大部份地方啲嘢都好好食。因為我知道個個人要求唔同丫嘛,所以之前非常、非常擔心我帶佢地去食嘅嘢佢地會覺得唔好食。但係最後佢地都食得開心,咁我亦都放心晒!之不過另外一個我最擔心嘅情況都係發生咗--我地因為第二日至第五日要影相嘅關係,搞到 Catherine 同 Bobby 嗰幾日成日要等等等等等好耐先有飯食,餓到處於發育時期嘅年青人暈咁濟!雖然最後都等到同食到好嘢,但等嘅過程的確係無陰功!

 

化裝篇

 

其實講返轉頭,今次呢個旅程會成行係全因為 banquet 個場地太貴嘅關係,我地好多其他地方都要收緊開支。又要貪心去泰國影相嘅我地唯有自組團隊,而唔係用外面啲 overseas pre-wedding package. 一來我地唔想俾咁多錢影相,二來佢地收你幾萬蚊淨係俾你影幾個鐘,仲要只包三、兩個景點同一、兩套衫,我覺得我係傻嘅先會俾呢個錢出嚟。唔係傻只係低能嘅我就諗住自組團隊買機票,揾化裝師、攝影師、styling 同買衫,等我鍾意去幾多地方、換幾多套衫都得!

 

之前有提到我上網揾咗一位嚟自布吉嘅阿 Oh 幫我化裝 set 頭。本來我地講好咗第一日同第四日因為淨係得半日,所以佢會化好個裝、整好個頭就走。然後第二同第三日會由早上幫我地到五點左右。包埋第一日開始化裝前會幫我做一個 Shiseido 式嘅面部按摩,總共收我 2750 港紙。你無睇錯我亦無打錯,兩個半日同兩個全日嘅 service 加埋個專業按摩都只係收咁多錢!首先講佢個按摩,真係 relaxing 同舒服到不得了。阿 Oh 之前喺 Shiseido 度做咗十年,係元老級化裝師(但係其實佢好後生,只係好後生開始做),所以喺 Shiseido 度 master 咗呢套面部按摩返嚟。佢一路幫我做嘅時候我一直喺度諗,如果之前嗰兩個化妝師無放到我飛機我真係唔知點算!

 

一向好唔鍾意化裝嘅我,其實每一次就算係俾專業人氏(包括幫 artiste 化裝嗰啲)幫我化,我化好之後照鏡永遠都覺得好肉酸。呢個好明顯唔關人地手勢事,係我自己睇唔慣自己化舞台化裝個樣。但係今次由阿 Oh 幫我化第一個妝開始,每一次化好後,我都覺得好靚(好唔知醜添,hehe)!可能係佢幫我化得好自然嘅關係,我亦可以表現得好自然、好有信心。呢份信心,絕對係令到啲相出到嚟效果好好一個好重要嘅關鍵。

 

另外就係 turned out 阿 Oh 係完全無 follow 之前傾好嘅時間--佢唔係無返足,而係返凸晒!第一日因為 Angus 澳門落大雨班機 delay, 阿 Oh 最後搞到成九點幾十點先走。第二日同第三日阿 Oh 都朝早九點幫我地幫到凌晨一、兩點!因為佢老公之前喺 email 有同我講唔想阿 Oh 咁夜走因為佢要返外家瞓,而外家係喺曼谷嘅邊皮地帶。我一直叫佢走先、走先,但係佢因為想我地效果好啲,想跟到我地影完為止,而我因為排到啲嘢好夜,所以阿 Oh 都好夜先肯走!一路過程當中佢唔單止幫我睇頭睇妝,佢仲會幫我地諗 concept, 諗 pose, 睇吓點樣出到嚟個效果會好啲。2750 港紙兩個半日同兩個全日加埋按摩已經係一個超現實嘅價錢,佢仲要幫我地做埋助導,平時內斂嘅老番都不停喺度碎碎念話我地真係好好彩揾到阿 Oh!而當我唔係同好好人士嘅阿 Oh 傾緊計嘅時候,就係心裡面充滿住無言嘅感激!

 

所以忍唔住要幫佢賣吓廣告。因為阿 Oh 之前都係要幫 Shiseido 週圍飛去化裝,所以佢都慣咗宜家接婚禮化裝或者幫人影相化裝要週圍飛。如果去開泰國任何地方影相或者結婚而好似我咁想自組團隊嘅朋友,可以聯絡佢。佢老公負責回覆嘅 email 快精準。 我可以斗膽同你講你都幾難可以喺泰國以呢個價錢揾到個好過阿 Oh 嘅人選!阿 Oh 嘅網頁 www.makeupinphuket.com

 

影相篇

 

因為 Angus 之前交帶落係會同我地影 4 日 3 夜,所以我地揀咗喺我地本先一早買咗機票呢個 6 日 5 夜嘅 trip 第二日至第五日影相。我之前太緊張驚去唔晒想去嘅地方,於是排到個行程密麻麻。其實我已經 cut 咗好多地方,但最後因為 Angus 極度盡責,每個地方都試好多角度同燈光效果,希望盡量影到最多同最好嘅相俾我,所以呢 4 日 3 夜 Angus 幾乎係無停過手,由落機影到上機!專業嘅 Angus 帶咗好多、好多張 memory card 過去,但係最後都唔夠影,要抄咁啲相落我部 Mac Book Air 度騰空啲位出嚟。初先仲以為唔知部 card 機定條 cable 有問題,試咗好多次都連接唔到,驚到我死會唔夠 memory 留俾最後嗰日影。最後終於駁到喇,但係我部電腦就唔夠位存相!搞到我要鏟走晒成個 Microsoft Office 同 Adobe 好多無用嘅 files. 最後都抄到晒啲相去我部機度,個過程好不刺激!

 

話說我未去之前因為都知自己係烈火大姑奶,而我真係好重視 Angus 呢個朋友,所以我唔想因為呢個 project 而同佢有摩擦。但係今次係搞結婚、去旅行仲要有工作關係夾雜喺裡面,簡直係最大鑊嘅情況炒埋一碟!有乜方法我可以避免摩擦嘅發生呢?於是乎我問定 Clara, 佢之前俾錢人地出邊影相最後攞返幾多幅相。Clara 話大概都只係 30 幅左右,我就決定同自己講,只要呢 4 日 3 夜 影嘅相有 30 幅係 ok 嘅我已經心滿意足。從來一句都無問過我會俾幾多錢佢嘅 Angus 幫我影咗超過 5000 副相!而我喺過程當中好心急咁喺佢部相機度要睇 preview 時,一定超過 30 個「嘩!好靚呀!嘩!好靚呀!」。而最後喺電腦度睇 confirm 咗我滿意嘅相仲竟然超過 300 幅!令我覺得呢次揾 Angus 幫我影結婚相係我人生中其中一個最好嘅決定!

 

我咁鍾意啲相係因為 Angus 影嘅相完全絕對係 exactly 我原本想要嘅效果。我好快會 upload 啲相喺呢度俾大家分享。Meanwhile, 如果想聯絡 Angus 影結婚相可以致電 63860888 揾佢!

 

 

Oh oh oh oh oh…

 

繼續講去曼谷影結婚相嘅籌備過程。

 

之前提到攝影師 confirm 咗喇,仲有人喺我地飛之前幫我地揀好晒衫做好 styling 添。咁去到嗰邊邊個幫我化裝呢?

 

去到呢個位唔可以唔介紹一下過去十年嚟幫我化裝剪頭髮嘅 Leon. 話說我有一位中學同學之前喺 Wall Street Journal 度做 lab assistant, 而 Leon 當時就係喺嗰間分校度學英文。我個 friend 都算係一個健談嘅人,所以就同 Leon 做咗朋友,更開始揾佢剪頭髮。我亦喺呢位朋友嘅介紹下開始揾佢剪頭髮喇。

 

Leon 剪頭髮真係好有心機,同好用心。你見佢會為咗份工可以同手上嘅外國客人溝通好啲而去學英文,佢工作態度嘅認真已經可見一斑。所以我後來都有將佢介紹俾更多嘅朋友,而連一啲我朋友嘅闊太朋友都好鍾意佢添!喺我介紹嘅人當中當然唔少得我最愛嘅老番喇。念舊嘅老番幾十年以嚟都係返油麻地揾返同一個師傅剪髮。但係我硬係覺得老番可以更靚仔。經我多番說服後老番終於肯試吓俾 Leon 剪。試過一次之後就從此無再返油麻地剪頭喇。

 

後嚟 Leon 更加想再拓闊自己嘅業務而去學埋化裝。所以後嚟我除咗會揾佢恤髮以外,每逢有婚宴或者需要去一啲隆重打扮嘅場合,唔曉化裝嘅我仲會揾佢化埋裝添。經過多次嘅經驗,Leon 可以令唔鍾意化裝嘅我都會對佢個手勢同 result 好有信心同感覺好舒服。

 

所以今次去影相,我最初步嘅計劃就係飛埋 Leon 過去幫我化裝。但係等咗好多個月,揾極辦法都揾唔到平機票(復活節檔期係全年去泰國最貴嘅時間),而如果加埋 Leon 已經相宜咗俾我地嘅費用我地都真係負擔唔嚟。雖然老番同我都極度唔想,但都只能打消呢個計劃嘅念頭。

 

好喇!俾唔起錢請個化裝師去,咁得返唯一嘅方法就係揾當地嘅化裝師喇。好彩泰國嘅網上文化已經係非常成熟,甚至可以話比香港走得更前。加上曼谷係一個極之依靠旅遊業嘅國家,所以佢地好多生意都會有網頁或者網址,包括自由身嘅化裝服務。所以我喺網上揾到唔少當地嘅化裝加髮型師。但因為我有個 friend 阿 Grace 提醒我之前佢地 on tour 去到美國揾咗一個泰國籍嘅化裝師,化到佢地人妖咁,所以我揀時都格外留神。如果我見到啲相唔多對路嗰啲會即刻 ban, 另外就係只化裝唔識 set 頭嘅就當然更加不能。最後喺有覆我同價錢啱嘅當中選擇咗一個。因為我特登預咗充裕嘅時間俾自己揾化裝師,呢位仁兄喺我地飛之前一個月 send email 嚟話要甩我底。咁好啦,我再揾第二個啦。今次喺我相信已經睇晒全曼谷嘅化裝師嘅網頁之後,揀到個印度女仔,個 portfo 都好似樣嘅。但係佢竟然喺我地臨去之前4日放我地飛機!呢啲時候當然我唔會同去客氣,覆返個 email 嘴咒到佢飛起。

 

得返四日,而我已經睇晒所有睇得嘅有關網址,但係已經再揀唔落手,於是我開始感覺到徬徨。我一路喺心裡面 go through 自己睇過嘅網頁,諗吓仲有咩辦法。喺呢個時候我就諗到試吓最後一著。 我留意到我望過嘅 portfo 裡面,好多係外國人去飲揾人化裝 set 頭。所以我試吓揾啲曼谷嘅 expat website 嘅 forum, 試吓揾吓有無人介紹。而曙光亦係呢個時候出現!

 

我 post 完我條問題之後,好快就有人覆我。喺好多唔係好有建設性嘅回覆裡面我見到一個人話自己老婆之前喺 Shiseido 做咗十年化裝師,宜家自由身幫人化裝整頭,然後留咗個私人 email 地址俾我,有見及此我就用 email 聯絡佢。唔似得好多之前我聯絡嘅酒店又好、化裝師又好鬼死咁耐先覆 email, 呢位 Geoff 同我一個接住一個 email 咁溝通,佢俾我嘅回覆更加係到題、清晰同好 make sense. 最緊要係我睇過佢地個 portfo 非常喜歡,而且價錢又啱,所以我已經諗住 confirm 佢。但係呢個時候就出現一個小波折。因為佢地其實係住喺布吉嗰度,而所以佢老婆阿 Oh 係要搭飛機去曼谷幫我化裝。為咗安全計佢地希望收咗我 deposit 先。當然我聽到都不期然會擔心佢地又會不會收咗我錢然後失蹤呢?於是乎我好老實咁同佢地話,當日已經係星期六,而我禮拜三已經飛,就算我禮拜一即刻過錢去佢地分分鐘禮拜三都未收到。我俾晒我酒店名同 check-in 名俾佢地叫佢地打去 check 我真係有 book 到房,有咩事可以去揾我,唔駛怕我失蹤。Geoff 睇完後亦好信任我,同我 go through 完嗰幾日個行程之後,就幫我約實佢老婆喺邊度 meet.

 

我寫呢篇 blog 嘅時候已經係影完相返嚟。我可以話俾你聽我個總結--我咁情急底下揾到阿 Oh 一個咁好嘅人幫我化裝整頭,我相信我係唔知幾多生修嚟嘅福分。佢有幾好,我會喺 post pre-wedding photo 嗰篇再同大家仔細分享。首先俾有興趣嘅朋友阿 Oh 嘅網址 www.makeupinphuket.com

 

 

淘寶訂西裝?

 

因為實在有太多結咗婚嘅朋友警告過我地,所以我地好早已經決定結婚當日會留多啲時間喺個廳度,唔會走咗去換衫轉妝 set 過個頭。亦正因為我地當日唔會換咁多衫,所以貪玩嘅我地就決定影結婚相會換多幾套衫喇!

 

之前有提到我地揾咗 Jammie Ting 幫我地做 styling, 佢大概俾咗個 idea 我要買點樣嘅西裝俾老番。Jammie Ting 建議我出去度身定做,大概一千蚊一套。但係老番今次要成三套西裝去襯返我唔同嘅造型,如果三套西裝要成三千蚊,我諗起都打冷震!俾二千幾蚊租我地覺得更加唔抵。加上我地要影四日三夜,所以好大機會要再加錢(多數租衫係租三日兩夜),所以真係唔知點算好。

 

最後我自把自為懶叻咁上淘寶揾西裝喇。我有 research 過吓,個做法係揾啲本地嘅專業裁縫度好身,然後就上淘寶揾啲有做我地鍾意嘅款嘅賣家,俾個尺寸佢地,叫佢地依住個尺碼度身定做。我聽落覺得好 make sense 好簡單,所以我跟手上網揾到話中環萬邦行有啲好老字號嘅裁縫,就同老番上去度身。度好身之後上淘寶揾到間啲款好睇態度又好嘅賣家,俾個尺寸佢地,就可以七百蚊幫我地做三套西裝!

 

 

其實我俾 Jammie Ting approve 啲款嘅時候俾佢發現我個淘寶訂西裝計劃,佢聽到都唔知點俾反應我。對男裝衫特別有要求嘅佢真係幾反對,但係反叛嘅我就覺得橫掂都無人試過,就等我試吓啦!可能無事呢!

 

最後啲衫嚟到,亦俾唔到我地一個出人意表嘅 pleasant surprise。總括嚟講老番只係得一個方法形容啲衫,就係好似魔術師嘅道具衫咁。無論係啲料定係個尺寸同款式都連亞視啲道具衫都好過佢!老番一路試,一路都唔知好嬲定好笑!

 

 

啲衫同啲裙一齊到香港嘅時候已經係我地臨飛之前最後個 weekend. 好彩老番禮拜六唔駛返工,於是就去太古城揾衫。呢個經歷又令我覺得我地其實好好彩,住得咁近太古城,一個咩舖頭都有嘅商場。老番喺 Zara 度買到一件好 fit 又好型嘅西裝,不過就要千幾蚊。然後第二套就係喺 H&M 最裡面嘅男裝部掛喺一排男裝衫最埋邊嘅一件好孤獨嘅斷碼西裝,點知又係 fit 到老番不得了,仲要標價都只係六百蚊。最開心嘅係,我地攞到埋 counter 俾錢先發現原來件褸仲有半價,只係需要三百蚊就搞掂!最最最後第三套因為係燕尾服,都肯定好難買。我上網發現都係金都最多款揀,同埋四、五百蚊有交易,所以決定去多金都一次。我地其實之前行過見到地下嗰層有一間租男裝衫,之但係我平時唔會行地鋪,因為一定貴過樓上,不過我地都係即管入去睇吓。因為個款好 fit 同兩父子個服務態度都好專業,所以我地都無再多行,決定同佢地租。價錢雖然唔平,要六百蚊,但係佢地唔駛因為四日三夜而加我地錢,所以我地亦即刻順晒氣!更好嘅係之前 Jammie 吩咐落要幫老番揾多對白色鞋,我地今次喺三樓揾到對老番好鍾意嘅白色半波鞋/禮服鞋,令到我地又搞掂多一樣嘢!

 

 

雖然最後洗多咗好多錢,但係買到同揀到老番好鍾意又著得有信心嘅衫先係最緊要。更開心嘅係淘寶個賣家最後唔洗我喊打喊殺,好順攤咁肯退返大部份嘅錢俾我,所以都唔駛蝕好多!今次買西裝嘅經驗實在好刺激好好玩,而如果有緣睇到呢篇 blog 嘅你本來都想喺淘寶訂西裝,但就因為你睇完我地嘅分享之後打消念頭,令到你地可以避免一次災難嘅發生,我都覺得我地呢個經歷係非常值得嘅!

 

失蹤的鞋子

 

仲有一個禮拜就飛泰國影相。呢個禮拜基本上除咗等淘寶啲貨到香港之外,就係喺香港做一啲 last minute shopping. 其實大部分嘅嘢都喺淘寶買晒,除咗有啲嘢因為個別原因要喺香港買,譬如係用嚟做道具嘅竹蒸籠。因為蒸籠好大,連埋運費可能喺香港買仲平,而且香港買都方便。本來諗住去西環啲舊舖頭度買,但係打去問發現佢地好早收,我放得工都趕唔到佢地收舖前去到,佢地 weekend 又唔開。所以最後都係揾個 weekend 去上海街度買。

 

話說好耐之前我一個人唔小心盲樁樁走咗去上海街近果欄嗰邊,發現有成個 block 都係賣俾餐廳嘅用品,覺得好神奇成世人都唔知市區有個咁嘅一隅。估唔到今次有機會同老番去買嘢。初初見到最大間嘅萬記,除咗個夥計態度奇差之外,佢地個價錢亦奇貴。我以為去到呢區會買到好平嘅價錢,點知一問,我地三個蒸籠要成二百蚊!我記得打去西環嗰啲都唔駛咁貴。對面嗰間陳枝記態度好好多,但價錢一樣。雖然老番開始有啲唔耐煩,但係我真係好唔捨得成二百蚊買三個蒸籠做道具,如果真係咁都買,我之前喺淘寶格嘅價就無晒意義。

 

我堅持行多幾間,然後發現好多間都已經淨係賣鐵蒸籠,而唔賣我地要嘅竹蒸籠,加上好多間舖頭因為靠近六點已經閂咗門。最後差唔多想放棄之時,去到街尾尾二嗰間,有好平嘅竹蒸籠賣,但係啲色水好似發髦咁。我死不甘心問埋隔離全條街最後嗰間舖頭,就發現到顏色又靚價錢仲靚嘅竹蒸籠--一百蚊都唔駛就可以買晒三個!!本來開始無晒耐性嘅老番不禁承認行多呢十五分鐘都抵!好嘢!我又無駛到冤枉錢喇!!

 

 

另外無喺淘寶買嘅仲有係鞋。我地無論係老番啲西裝定我啲裙都喺淘寶買,唯獨係啲鞋就留喺香港買。我從來好少喺淘寶買鞋,因為自己半碼,而淘寶啲好多都唔足碼,即係真實個尺碼同對鞋上面寫個碼有出入,所以試過一次買咗返嚟唔啱著,以後就無再買。今日趁過海去多次金都,揾返一間以前做伴娘幫襯過嘅鞋舖,順便可以等老番睇埋金都有無啱嘅男裝鞋。

 

老番行咗個圈之後話啲鞋唔啱佢,我就去到我要揾嗰間舖頭,聽老闆娘介紹咗一陣。我覺得啲鞋雖然唔能夠令我十分之鍾愛,但係都揀到一個大路嘅款式同加啲咩配飾上去,老闆娘就即刻幫我地用 15 分鐘釘起佢。之後老番因為約咗舊朋友慶祝生日就要走先,留底我等埋老闆娘起貨。搞掂好晒之後,我就喺彌敦道度搭小巴返筲箕灣。

 

因為今日行咗好多路,個人好虛脫。我一上到小巴就瞓著咗。我平時有留意警訊話上公共交通工具如果瞓覺要特別小心(最好就唔好瞓覺添),但係我真係控制唔到,所以我瞓前將所有袋(包括我啲蒸籠、對鞋同我自己個手袋)捉到實一實。中途因為好熱嘅關係我都醒咗幾次,都有 feel 到啲嘢仲係安全。最後去到筲箕灣尾二個站起身落車,到我落咗車先發現我少咗一袋嘢,而我唔見咗嘅係我對鞋!我 check 晒剩返嘅袋都無對鞋喺裡面(其實試問又點會有呢)就成個人慌晒。我電話又無電,唔知可以點算!情急之下,我見到下一架小巴經過,我即刻截停佢,上去求救。個司機大佬好好人咁車咗我去尾站睇吓之前載我架車會唔會喺度。其實我初初都無諗過自己會唔會認得架車,但係一去到我就好肯定停喺嗰度架車就係我之前搭嗰架,因為我喺旺角上車時有留意車尾身嘅細節。個司機喺度買緊宵夜,佢出到嚟見到我都認得我,開門俾我上車揾。我咁好彩,咁到底我揾唔揾得返對鞋呢?

 

結果係我上到車都係揾極都揾唔到,司機都話執嘢時都無見過,只係同我傾有邊個乘客係有機會偷咗我個袋,話最大可能係最後同我一齊落車嗰個男人。我唯有好傷心地離開,但係就好傻咁喺嗰頭行咗個圈,每經過一個垃圾筒就裝吓裡面,睇吓個賊會唔會見到原來個袋裡面係對爛鬼鞋就掉咗佢,可惜我都 no luck. 最後一路行就行到返屋企。

 

喺我行緊嘅路程當中,我一路覺得唔見咗呢三百蚊覺得好肉痛。於是我決定博吓,去之前安琪喺淘寶度買到又平又舒服嘅結婚鞋嗰個賣家度揀鞋,然後用順豐 send 嚟香港,趕得切之餘,仲唔駛洗好多錢。我返到屋企成晚就喺淘寶度揀鞋,最後揾到三對覺得好靚好襯啲裙嘅鞋,總共都係二百幾蚊!同個賣家一再確定個碼係啱之後,就翹埋雙手等啲鞋嚟。

 

三對鞋我都好鍾意,令我覺得可以有個緣份俾我買到咁鍾意嘅鞋好開心,但係就俾老番笑我根本就係唔鍾意金都對鞋,特登整唔見佢地!哈哈!可能係都唔定㗎!唔知呢!總之我收到淘寶啲鞋時,有咩再喺度 update 啦!

 
Our Recent Blog Posts
Pages: 1 2 ... 5
Counting Down to our Big Day!

Calendar
September 2016
M T W T F S S
« Aug    
 1234
567891011
12131415161718
19202122232425
2627282930  
Wanna talk to the donuts?