2011年 12月 回顧

過咗個聖誕同新年假,無停過出街食嘢同同朋友聚會(同埋我地自己拍拖),加上呢個禮拜病到死咗,要快手 update 吓呢個 blog 先。等我就一次過紀錄喺呢個假期裡面 wedding 方面嘅 update 啦!

 

新低
1)經過非常愉快嘅兩個假期,我體重不但無重返,竟然係仲輕咗。正確嚟講,由 Francis 同我求婚嗰日嘅十月一號開始起計,到到宜家一月頭,我輕咗6kg. 慢就係慢啲,但係我知道要慢慢減先健康,同埋我揾到適合自己嘅方法減,可以照食大部分我鍾意食嘅嘢,唔會好 depressed, 或者因為過度壓抑自己而形成反彈效果(即係我之前咁多年裡面每次減肥嘅結果)! 我計過,如果我照我宜家個進度,然後到3月開始暴力做運動,到我4月影第一輯結婚相時應該已經好ok! 而如果可以繼續個進度到十月,到 wedding 時就更可以完全達標!我好為咗自己呢個進度而覺得好驕傲,特別係對於我竟然喺自己最鍾意嘅聖誕節度都無重到,感到非常自豪!快啲幫手俾啲叻嚟!

 

利發物流淘寶集運
2) 喺放聖誕假前,因為順便買埋有幾個聖誕 party 嘅交換禮物,我喺淘寶度買定咗啲結婚時要用嘅嘢。由12個唔同嘅賣家寄出嘅嘢,發去我一向用開喺廣州嘅利發物流;物流公司再幫我轉發嚟香港。我啲嘢加加埋埋成架 van 個後尾箱塞買晒咁多同好重好重,經物流公司轉發嚟香港只係80蚊港紙!真係平死、平死、平死!我個好姊妹 Angus 有見及此已經同我攞咗個物流公司 contact. 聽講佢啱啱買咗兩個大櫃送上門都係130蚊運費,呢件就真係名副其實抵死、抵死、抵死!

 

豬 acandystore x 衰 UPS
3) 兩單好消息後,係一件幾古靈精怪北美洲嘅事。除咗喺淘寶買咗嗰啲嘢外,因為我嘅多年好友 Katy Tsim 返加拿大探親兼放假。我有見及此,梗係又再訂啲糖麻煩 Katy 幫我帶返嚟。因為今次 Katy 係由加拿大返,上次寄去 Connie 度嗰間如果寄去加拿大嘅話運費幾貴吓,所以今次要再揾第二間。最後揾咗一間叫 acandytore.com 嘅嘢,啲糖嘅價錢唔單只 competitive,連埋運費同有張 discount coupon 係我揾到嘅 shop 當中價錢最平!於是乎我就連忙落 order, 好等啲嘢可以 well before Katy 離開加拿大前可以送到去,唔駛趕頭趕命。喺呢個時候,有兩個幸福位。第一個係,我每一次有呢啲舊朋友義不容辭咁幫我手我結婚啲嘢,我都覺得好感動,因為我知道就算人地顯得幾無所謂都好,都係真係要將自己嘅嘢暫時擺埋一邊,去花時間幫你;第二,係我覺得我自己喺呢個年代結婚好幸福。有 whatsapp 同 facebook 呢啲發明,令我同遠方幫我嘅朋友可以緊密聯繫,令到件事事半功倍。就係因為咁,有一日我突然收到 Katy whatsapp 話 UPS 同佢地講要佢地預備 50 蚊加幣喺送貨時要收埋!我當堂嚇一跳!我喺 acandytore.com 度睇到,知道佢地 as usual 無收我地稅,但係會喺包裹上面講明貨品幾多錢,然後過關時海關就要打啲基本稅,UPS 就會送貨時同我地收埋。但係我啲糖加埋先得嗰七十幾蚊加紙,啲稅收到足都係十蚊加紙左右,因乜事 UPS 要我地俾五十幾蚊(即係要成港幣400蚊)!!??後來我喺網上面揾到啲資料,知道原來間衰 UPS, 因為如果佢地喺海關度幫你俾咗稅先,就會收你呢個所謂 brokerage fee 嘅墊支服務費,往往係你產品總值嘅 50%,亦即係變相吸血貴利!! 呢啲資料喺 acandystore.com 度完全無提,令我呢個網上購物老sfut 有被瞞騙嘅愚蠢感覺!而 UPS 唔肯收返件貨,acandystore 又詐傻扮矇唔覆我。我計過數,俾咗呢50蚊就每條糖貴咗1蚊港紙左右,唯有算數,叫 Katy 幫我照俾。咁我諗住,算啦,當學下嘢,知道 UPS 係咁衰,叫埋全部 friend 以後唔好用,當幫埋佢地梗,始終都係抵咗。但係點知,過咗兩日,UPS 又再 delivery 一個一模一樣嘅包裹俾 Katy, 同埋再收佢一次 brokerage fee. 我上網做 tracking 先發現到原來 acandystore 低能仔將我個 order send 咗三次出嚟,我第二同第三包淨係俾 brokerage fee 就有咁多糖就真係好抵!雖然好可惜最後唔知點解第三件收唔到,可能 acandystore 發現得早縮得切,不過我已經賺咗一次,已經好開心!雖然今次acandystore 唔老實,但我都賺咗,全靠 Katy 幫我之外,我開始覺得我阿媽帶我嚟呢個世界嘅目的唔係教小朋友、唔係幫家長,而係上網買嘢。我真係開始深深咁相信……:D

 

誠意做裙小店 Joie
4) 之前寫咗一篇關於新興嘅內地婚紗廠網店,話我打算會揾一間叫 dressilyme.com 嘅訂做婚紗。今次又有出人意表嘅發展喇!話說我未揾到 dressilyme 之前有嘗試過吓揾香港嘅做婚紗,始終覺得三口六面好溝通啲。但係我揾過嘅一係感覺好吹水或好敷衍(可能好多人齋問唔幫襯),一係就好貴,所以好快我就放棄咗。到當我準備想同 dressilyme confirm 邊隻顏色時,突然間有一間我之前問過叫 Joie 嘅做裙公司,但佢地話佢地只係做開姊妹裙,雖然佢叫我照 send 條婚紗啲圖俾佢睇,但係大家都無再 follow up. 但係佢突然打嚟話幫我揾到條裙,問我咩碼,話 send 落嚟俾我睇。點知一個禮拜後,就再 call 我話條裙做好咗叫我佢試!我非常之咁驚訝佢地嘅誠意,原來佢地係幫我做條裙止啱,同埋我完全未俾 deposit 嘅情況下佢照幫我做。雖然可能最後價錢唔啱,但佢地咁有誠意,我覺得都係要上去試吓嘅。我上到去佢地旺角嘅樓上小店,發現原來係一個女仔負責晒所有嘢,佢攞條裙出嚟俾我睇,簡直係同我要嘅幾乎一模一樣!但係可惜溝通上我地有啲誤會,我俾佢個碼係我諗住減完肥個碼,咁即係,嘻嘻,條裙太太太細,我嘗試著上身要喺後面加一塊先似著起咗條裙。但係價錢方面,完全啱晒我地 budget, 所以我當場就決定咗揾佢地!宜家只係等我減多啲肥,再上去度身做過條啱 size 啱顏色嘅(廠嗰邊睇圖理解錯咗前有部份個顏色)。結婚有呢啲咁峰迴路轉嘅發展我覺得真係好好玩呀!

 

多謝德哥!
5) 我地嘅回禮製作已經進行得如火如荼。但因為我地係全自己 idea, 揾人訂做。但係我地聽講如果揾內地嘅廠做嘢千萬唔好要佢地 improvise 同執生,一定要講到清清楚楚,最好有晒圖同白紙黑字。於是乎,以防萬一,唔好得個講字,我地揾咗 Francis 工作上嘅好拍檔德哥,麻煩佢用佢超凡嘅畫工幫我地將腦裡面個設計畫出嚟,等個廠照住做。我識咗 Francis 就嚟四年,成日聽 Lofan 讚德哥有幾勁,今次終於、終於親眼見到之餘,仲可以用到德哥嘅才華,真係好光榮同感動!雖然個製成品未見到,但係德哥幅圖根本就係 exactly 我想要嘅嘢,我絕對相信德哥 crossover 我地內地嘅同胞唔會讓我失望!希望你地都鍾意我地個回禮啦!

 

呢一回咁長篇大論,你如果到呢度仲睇緊咁行動證明你都真係幾關心我地。你值得留個言俾我知道我有個咁好嘅朋友!And see you around soon!

 

No related posts found.

2 Responses to “2011年 12月 回顧”

EdwinDouDouBeanBean:

我真係睇晒咁長既長篇大論喎! 係咪好fd先??? XDDD

    Yes, very friend and makes me feel very touching! And notice that you are probably the only one!!

What do you think?

Our Recent Blog Posts
Pages: 1 2 ... 5
Counting Down to our Big Day!

Calendar
February 2020
M T W T F S S
« Aug    
 12
3456789
10111213141516
17181920212223
242526272829  
Wanna talk to the donuts?